søndag 10. mai 2015

Måseportrett

Det er mange som tykkjer at måsane er nokre innpåslitande og stygge skapningar.  Rett nok kan dei være litt irriterande og bråkete av og til og spesiellt i hekketida, likevel tykkjer eg at dei er både vakre og elegante fuglar.  Under ørnesafariet på Smøla forrige helg fekk vi rikeleg høve til å trene på å "skyte" måsar som vart fora med brød av dei fantastiske guidane våre.  Ein flokk på 10-20 måsar var heile tida over og rundt båten, noko som gav oss ypperleg trening med kamera mellom kvar gong vi såg ørn.  Her kjem nokre av måsebilda mine, og eg held fast på at det er fine fuglar.




















søndag 3. mai 2015

Ørnesafari på Smøla

Denne helga har ein liten gjeng frå Nordfjord fotoklubb vore på ørnesafari på Smøla.  Vi reiste oppover fredag morgon, og kom igjen no søndag kveld.  Det vart ei innhaldsrik og spanande helg med mykje fotografering.  Vi var to turar ut i båt med ørneguide, fredag kveld og grytidlig laurdags morgon.  Fredag var det fantastiske forhold med mykje ørn og nydeleg lys, laurdag var det tyngre vær, isande kaldt (frose på bilen då vi for ut kl 05) og ørnene var ikkje heilt ihuga på så tidleg frokost.  Likevel vart det fantastiske dagar med mykje bilder, eg sjølv hadde for ein gong skuld feil innstilling på bildekvaliteten på kamera fredag og "ødela" alle ørnebilda mine.  Tilsynelatande ser dei nokolunde ut, men kunne vore mykje betre.  Ein dyr lærepenge.  Vi køyrde og rundt omkring på øya og ikkje minst ut til Veidholmen, ein utruleg flott plass med tett  i tett med flotte spanande hus og fotomotiv i fleng.  I fyrste omgang blir det "berre" ørnebilder eg legg ut, men det kjem fleire bilder frå turen etterkvart.










mandag 27. april 2015

Beethovens 9

I nesten fullsett sal og til fortent brakapplaus i operahuset i går kveld vart det nok ein suksesskonsert under leiing av Michael Pavelich. Med topptrimma fantastiske solistar, framifrå orkester og eit utruleg flott kor med eit trøkk som nesten fekk veggane til å revne vart det ein uforgløymeleg kveld.  Her kjem  nokre glimt av det eg fekk med meg av det som vart servert frå scena.


























fredag 24. april 2015

Hjørundfjorden

Er du av den typen som set deg i bilen og hastar avstad for å kome fortast mogeleg frå A til B går du glipp av mange naturperler rundt om i distriktet.  Ei av desse perlene er Hjørundfjorden på Sunnmøre. Vi har mange gonger teke turen til desse små grendene som klorar seg fast i dalar og på nes blant stupbratte fjell som reiser seg nesten loddrett opp frå fjorden til 14-1500 meters høgde.  Seinast sist søndag var vi ein fin tur til Viddal og gjekk anleggsvegen opp til det nye kraftverket oppe i dalen.  Vi la spesiellt merke til at arkitekturen på det nye betongbygget stod i stil med fjelltoppane ikring.  I fjor sommar var vi og til Bjørke og det fantastiske Bakketunet, som er det eldste og best bevarte tunet på Sunnmøre og er heilt frå 1549.  Her er det utstillingar og aktivitet heile sommaren.   Ein av grunnane til at vi la turen dit var at "vår eigen" fantastiske kunstnar Kathrine Berg hadde utstilling der i dei flotte lokala til  primus motor bak Bakketunet, Marita Bett Aakre.  Både Bakketunet og heile området rundt er absolutt verdt eit besøk, og det blir garantert ikkje siste gongen vi tek turen opp dit.  Bilda er frå begge turane.